"കുട്ടി ഒന്നും കഴിക്കുന്നില്ല ഡോക്ടർ..." അമ്മമാരുടെ ഈ സ്ഥിരം പരാതിക്ക് പിന്നിലെ യഥാർത്ഥ കാരണം

 കുഞ്ഞുങ്ങളും അമ്മമാരും ഉള്ളിടത്തോളം കാലം ചർച്ചകൾ അവസാനിക്കാത്ത ഒരു വിഷയമുണ്ട്– "കുട്ടികൾ ഭക്ഷണം കഴിക്കുന്നില്ലെന്ന പരാതി". കഴിഞ്ഞ ഡോക്ടേഴ്സ് ഡേയിലും ഇതേ വേവലാതിയുമായി ഒരു അമ്മയും നാല് വയസ്സുകാരൻ മകനും എൻ്റെ ക്ലിനിക്കിൽ എത്തിയിരുന്നു. ഒന്നും കഴിക്കുന്നില്ല എന്ന് അമ്മ പറയുമ്പോഴും ആ കുഞ്ഞ് നല്ല മിടുക്കനായി ഇരിക്കുകയായിരുന്നു. കസേരയിലിരുന്ന പാടെ ആ അമ്മയുടെ മുഖത്ത് വലിയൊരു ആകുലതയുണ്ടായിരുന്നു. "കുട്ടി ഒന്നും കഴിക്കുന്നില്ല ഡോക്ടർ, ആകെ ക്ഷീണിച്ചുപോയി..." വേവലാതിയോടെ അവർ പറഞ്ഞു തുടങ്ങി.

ആ അമ്മയുടെ സങ്കടങ്ങളും വേവലാതികളും ഞാൻ കസേരയിലേക്ക് അല്പം ചാരിയിരുന്ന് ക്ഷമയോടെ കേട്ടു. അവൻ ഒന്നും കഴിക്കില്ലത്രേ! ദോശ കൊടുത്താൽ കഷ്ടിച്ച് ഒരെണ്ണം കഴിച്ചാലായി, ചോറ് വളരെ കുറച്ചേ കഴിക്കൂ, എപ്പോൾ ഫുഡ് മുന്നിൽ വെച്ചാലും 'വേണ്ട' എന്ന് പറഞ്ഞ് ഓടും... അങ്ങനെ നീളുന്നു ആ അമ്മയുടെ പരാതികൾ.

അമ്മ പറഞ്ഞു നിർത്തിയപ്പോൾ ഇനി എൻ്റെ ഊഴമായി. ഞാൻ പതിയെ ആ കുഞ്ഞിൻ്റെ അടുത്തേക്ക് നീങ്ങി അവനോട് സൗഹൃദത്തിൽ ചോദിച്ചു, "മോന് എന്തൊക്കെ കഴിക്കാനാ ഇഷ്ടം?" കുഞ്ഞിൻ്റെ മറുപടി പെട്ടെന്നായിരുന്നു, ബിസ്കറ്റ്, ചോക്ലേറ്റ്, ബേക്കറി ഐറ്റംസ്, പിന്നെ ബിരിയാണി... ഇതൊക്കെയാണ് കക്ഷിയുടെ പ്രിയപ്പെട്ട വിഭവങ്ങൾ.

ഞാൻ അമ്മയുടെ മുഖത്തേക്ക് നോക്കി ചോദിച്ചു, "ഓക്കെ, കുഞ്ഞ് ഇതൊക്കെയാണ് കഴിക്കുന്നതെങ്കിൽ നന്നായി കഴിക്കാറുണ്ടോ?"

"ഉണ്ട് ഡോക്ടർ, അവന് ഇഷ്ടമുള്ളതാണെങ്കിൽ അവൻ നന്നായി കഴിക്കും!" അമ്മയുടെ മറുപടി.

"ഡെയ്‌ലി വയറ്റിൽ നിന്നും കൃത്യമായി പോകുന്നുണ്ടോ?"

"ഉണ്ട് ഡോക്ടർ."

"വെള്ളമൊക്കെ നന്നായി കുടിക്കാറുണ്ടോ?"

"അതും കുടിക്കുന്നുണ്ട്."

ഇനി കാര്യങ്ങൾ കൃത്യമായി മനസ്സിലാക്കാൻ ഞാൻ അവൻ്റെ വെയിറ്റ് ഒന്ന് നോക്കി. 14 കിലോയുണ്ട്! അതായത്, നാല് വയസ്സുള്ള ഒരു ആൺകുട്ടിക്ക് ഈ പ്രായത്തിൽ ഉണ്ടാകേണ്ട കൃത്യമായ ശരാശരി ഭാരം അവനുണ്ട്.

അവിടെ വെച്ച് ഞാൻ ആ കുടുംബത്തിൻ്റെ ചില ദിനചര്യകൾ കൂടി ചോദിച്ചറിഞ്ഞു. അപ്പോഴാണ് കഥയിലെ യഥാർത്ഥ വില്ലന്മാരെ പിടികിട്ടിയത്. എന്നും വൈകുന്നേരം അച്ഛൻ ജോലി കഴിഞ്ഞു വരുമ്പോൾ കയ്യിൽ മിഠായിയുണ്ടാകും. അത് പോരാഞ്ഞിട്ട് അച്ഛാച്ചനും അച്ഛമ്മയും ഒക്കെ സ്നേഹം മൂത്ത് ഇടയ്ക്കിടയ്ക്ക് ബേക്കറി പലഹാരങ്ങൾ വാങ്ങി നൽകും. ചുരുക്കത്തിൽ, വീട്ടിൽ നമ്മൾ സാധാരണ ഉണ്ടാക്കുന്ന ചോറിനോടും ദോശയോടും മാത്രമാണ് ആ കുഞ്ഞിന് താല്പര്യമില്ലാത്തത്. പകരം ഇടവേളകളിൽ കിട്ടുന്ന ഈ പലഹാരങ്ങൾ അവൻ വയറു നിറയെ കഴിക്കുന്നുമുണ്ട്. അതുകൊണ്ട് തന്നെയാണ് അവൻ്റെ തൂക്കത്തിന് യാതൊരു കുറവുമില്ലാത്തത്.

ഇവിടെയാണ് അമ്മമാർ ഒരു പ്രധാന കാര്യം മനസ്സിലാക്കേണ്ടത്. കുട്ടികൾക്ക് വിശപ്പില്ലാത്തതല്ല പ്രശ്നം, അവർക്ക് വീട്ടിലെ ആരോഗ്യകരമായ ഭക്ഷണത്തോട് മാത്രമാണ് താല്പര്യമില്ലായ്മ. ചോറിനും ദോശയ്ക്കും പകരം ബേക്കറി പലഹാരങ്ങളും മിഠായികളും കൊണ്ട് വയറു നിറയുമ്പോൾ, സ്വാഭാവികമായും പ്രധാന ഭക്ഷണ സമയത്ത് അവർ 'വേണ്ട' എന്ന് തന്നെ പറയും.

കുട്ടികളിൽ കൃത്യമായ ഭക്ഷണശീലം ഉണ്ടാക്കിയെടുക്കാൻ വീട്ടിലുള്ള എല്ലാവരുടെയും ഒരുമിച്ചുള്ള സഹകരണം ആവശ്യമാണ്. പ്രധാന ഭക്ഷണത്തിന് തൊട്ടുമുൻപ് ഇത്തരം സ്നാക്കുകൾ നൽകുന്നത് പൂർണ്ണമായും ഒഴിവാക്കുകയാണ് ഇതിനുള്ള ആദ്യപടി. ഒപ്പം കുഞ്ഞിന് കൃത്യമായ വിശപ്പ് വരാൻ ആവശ്യമായ ശാരീരിക അധ്വാനവും കളികളും ഉറപ്പാക്കുകയും വേണം. കുട്ടിയുടെ ശരീരഭാരവും വളർച്ചയും കൃത്യമാണെങ്കിൽ അമ്മമാർ അനാവശ്യമായി വേവലാതിപ്പെടേണ്ടതില്ല, പകരം സ്നേഹപൂർവ്വം അവരുടെ ഭക്ഷണശീലം പതിയെ മാറ്റിയെടുക്കാൻ ശ്രദ്ധിച്ചാൽ മാത്രം മതിയാകും