കുട്ടികളിലെ മൊളസ്കം കോൺടോജിയോസം: കാരണങ്ങളും ലക്ഷണങ്ങളും ഹോമിയോപ്പതി ചികിത്സയും.

 

നിങ്ങളുടെ കുട്ടിയുടെ മുഖത്തോ ദേഹത്തോ ചെറിയ, മിനുസമുള്ള കുരുക്കൾ എപ്പോഴെങ്കിലും ശ്രദ്ധയിൽപ്പെട്ടിട്ടുണ്ടോ? ആദ്യമായി കാണുമ്പോൾ ഇതെന്താണെന്നോർത്ത് നമുക്ക് ചെറിയൊരു ആശങ്ക തോന്നുന്നത് സ്വാഭാവികമാണ്.

ഈയിടെ എൻ്റെ ക്ലിനിക്കിൽ വന്ന ഒരു നാല് വയസ്സുകാരൻ്റെ പ്രശ്നവും ഇതുതന്നെയായിരുന്നു. പരിശോധനയിൽ ആ കുരുക്കൾ മൊളസ്കം കൺടോജിയോസം (Molluscum Contagiosum) ആണെന്ന് മനസ്സിലായി. പേര് കേട്ട് ഭയപ്പെടേണ്ട, കുട്ടികളിൽ വളരെ സാധാരണയായി കണ്ടുവരുന്നതും എന്നാൽ പലപ്പോഴും രക്ഷിതാക്കളെ ആശങ്കപ്പെടുത്തുന്നതുമായ ഒരു ചർമ്മ അവസ്ഥയാണിത്. നമുക്ക് ഇതിനെക്കുറിച്ച് കൂടുതൽ അറിയാം.

എന്താണ് മൊളസ്കം കോൺടോജിയോസം?

'പോക്സ് വൈറസ്' (Poxvirus) വിഭാഗത്തിലെ ഒരു വൈറസ് മൂലമുണ്ടാകുന്ന നിരുപദ്രവകാരിയായ ഒരു ചർമ്മരോഗമാണിത്.

പ്രധാന തിരിച്ചറിയൽ ലക്ഷണങ്ങൾ:

• ചർമ്മത്തിന്റെ നിറത്തിലോ ഇളം പിങ്ക് നിറത്തിലോ ഉള്ള, മിനുസമാർന്നതും താഴികക്കുടത്തിന്റെ ആകൃതിയുള്ളതുമായ കുരുക്കൾ.

• ഈ കുരുക്കളുടെ മധ്യഭാഗത്തായി കാണുന്ന ഒരു ചെറിയ കുഴി (Central Umbilication) ഇതിന്റെ പ്രധാന സവിശേഷതയാണ്.

• സാധാരണയായി വേദനയോ ചൊറിച്ചിലോ ഉണ്ടാകാറില്ല, എന്നാൽ ചിലപ്പോൾ നേരിയ ചൊറിച്ചിലിനും ചുറ്റുമുള്ള ചർമ്മം വരണ്ടുപോകുന്നതിനും സാധ്യതയുണ്ട്.

രോഗവ്യാപനം എങ്ങനെ?

ഇതൊരു സാംക്രമിക രോഗമാണ്.

• രോഗബാധിതരുമായി നേരിട്ടുള്ള ശാരീരിക സമ്പർക്കത്തിലൂടെ.

• രോഗി ഉപയോഗിച്ച ടവ്വൽ, വസ്ത്രങ്ങൾ, കളിപ്പാട്ടങ്ങൾ എന്നിവ പങ്കുവെക്കുന്നതിലൂടെ.

• ശരീരത്തിന്റെ ഒരു ഭാഗത്തുള്ള കുരുക്കൾ മാന്തുന്നത് വഴി മറ്റ് ഭാഗങ്ങളിലേക്ക് വ്യാപിക്കുന്നതിലൂടെ (Autoinoculation).

പരിചരണവും പ്രതിരോധവും

ചികിത്സയില്ലാതെ തന്നെ കാലക്രമേണ (6-18 മാസം) ഇത് ഭേദമാകുമെങ്കിലും, രോഗം വ്യാപിക്കുന്നത് തടയാനും വേഗത്തിൽ സുഖം പ്രാപിക്കാനും ശരിയായ പരിചരണം ആവശ്യമാണ്.

• കുരുക്കൾ മാന്തുകയോ പൊട്ടിക്കുകയോ ചെയ്യരുത്. ഇത് അണുബാധ പടരാനും ചർമ്മത്തിൽ സ്ഥിരമായ പാടുകൾ ഉണ്ടാകാനും കാരണമാകും.

• വ്യക്തിശുചിത്വം ഉറപ്പാക്കുക. രോഗി ഉപയോഗിക്കുന്ന വസ്ത്രങ്ങളും ടവലുകളും പ്രത്യേകം കഴുകി ഉപയോഗിക്കുക.

ഹോമിയോപ്പതി ചികിത്സയുടെ പ്രസക്തി

കുരുക്കൾ ചുരണ്ടി നീക്കം ചെയ്യുന്നതും (Curettage) തണുപ്പിച്ച് കരിക്കുന്നതും (Cryotherapy) പോലുള്ള വേദന നിറഞ്ഞ ചികിത്സാരീതികളിൽ നിന്ന് വ്യത്യസ്തമായി, ഹോമിയോപ്പതി സുരക്ഷിതവും ഫലപ്രദവുമായ ഒരു പരിഹാരം നൽകുന്നു.

ഹോമിയോപ്പതി ചികിത്സ ശരീരത്തിന്റെ സ്വാഭാവിക പ്രതിരോധശേഷിയെ ഉത്തേജിപ്പിച്ച് വൈറസിനെതിരെ പ്രവർത്തിക്കാൻ സഹായിക്കുന്നു. ഇതുവഴി, യാതൊരുവിധ വേദനയോ പാടുകളോ ഇല്ലാതെ രോഗം പൂർണ്ണമായി ഭേദമാക്കാൻ സാധിക്കുന്നു. രോഗിയുടെ ശാരീരികവും മാനസികവുമായ ലക്ഷണങ്ങളെയും പ്രകൃതത്തെയും അടിസ്ഥാനമാക്കിയാണ് ചികിത്സ നിർണ്ണയിക്കുന്നത്. അതിനാൽ, ഈ അവസ്ഥയ്ക്ക് കൃത്യമായ രോഗനിർണ്ണയത്തിനും ഫലപ്രദമായ ചികിത്സയ്ക്കുമായി ഒരു ഹോമിയോപ്പതി ഡോക്ടറെ സമീപിക്കുക.